Sukur awit sego pecel
Enjing punika taksih saged ngraosaken sarapan sego pecel. Ketingalipun namung sego pecel. Manawi pun tingali kok njih namung prekawis sepele.
Ananging manawi pun galih-galih kanthi saestu lan lebet. Prekawis sego pecel punika nggadhahi piwucal ingkang maedahi sanget. Cobi kita raos-raosaken.
Sego punika kadamel saking uwos ingkang sawaunipun awujud pari. Pari biasanipun katanem wonten sawah utawi tegal. Saking nyebar winih dumugi pari kapanen mbetahaken wekdal watawis 3 dumugi 4 wulan.
Tiga dumugi sekawan wulan punika wonten ingkang ngupakara inggih punika para tani. Kanthi telaten taneman pari punika karimat kanthi saestu. Mboten namung tenaga ananging ugi prabeya lan sanes-sanesipun. Lan ingkang paling utami wonten Ingkang Maha Kawoso ingkang paring gesang dhumateng pari kalawau.
Punika nembe bab sego. Dereng sayur-sayuran ingkang pun dadosakèn campuraning pecel punapa dene sambelipun. Manawi pun etang kathah sanget tiyang lan tangan-tangan ingkang sampun nyambut damel lan nyiapaken sego pecel punika kalawau.
Mbok manawi punika ingkang saged kita dadosaken alesan: saben-saben kedah ngucap sukur saderengipun dhahar punapa kemawon. Sukur dene awit sego pecel kita ngucap sukur.
(Setu Pon, 27 Juli 2019, sor pelem ngarep omah)
Tidak ada komentar:
Posting Komentar