KINCLONG

Kinclong

Jam 17.26 dumugi griya. Kendaraan ingkang kala wingi pun lebetaken dhateng carwash nembe pun teraken. Makaten pawarta saking pambajeng.

Saderengipun mlebet carwash, kendaraan punika cetipun sampun mblawus. Malah ing mrika-mriki wonten rereget ingkang sami nemplek. Pancen sampun umur sawetawis tahun margi weton 2009. Dados limrah kemawon mboten kinclong malih.

Watawis kalih minggu kapengker wonten satunggal kanca ingkang tawa-tawa. Kanca punika gadhah usaha carwash mandi uap lan janjinipun saged nginclongaken malih cetipun kendaraan. Lajeng nyoba ngaten kemawon.

Hasilipun pancen nyata. Werna cemeng ingkang saderengipun mblawus dados kinclong mencorong malih. Sadaya punika saged kedadosan amargi dipun garap kathi saestu, kalawan ati, makaten promosinipun.

Sadaya pancen saged kadadosan. Punapa kemawon ingkan katindakaken kanthi saestu, kalawan ati, wusananipun mesthi sae. Amargi gumolonging manah nindakaken pakaryan punika satunggalipun syarat. Syarat amrih sedaya ngasilaken kasaenan ingkang ngremenaken.

(Rebo Wage, 7 Agustus 2019)